پاکستانی فلم ’’میرا لیاری‘‘ کی اداکارہ دنانیر مبین نے بہترین اداکارہ کا ایوارڈ جیت لیا

روس کے دارالحکومت ماسکو میں منعقدہ دوسرے بین الاقوامی یوریشیائی فلم ایوارڈز ’’ڈائمنڈ بٹر فلائی‘‘ (Diamond Butterfly) میں پاکستانی فلم ’’میرا لیاری‘‘ کی باصلاحیت اداکارہ دنانیر مبین نے بہترین اداکارہ کا عالمی اعزاز اپنے نام کر لیا ہے۔

پاکستانی اداکارہ دنانیر مبین کو یہ prestigous ایوارڈ فلم ’’میرا لیاری‘‘ میں ان کی جاندار اور متاثر کن اداکاری پر دیا گیا۔ ڈائمنڈ بٹر فلائی فلم ایوارڈز کی دوسری سالانہ تقریب میں دنیا کے مختلف ممالک سے تعلق رکھنے والی نمایاں فلموں اور فنکاروں کو اعزازات سے نوازا گیا، جن میں پاکستان کی نمائندگی کرنے والی فلم ’’میرا لیاری‘‘ بھی شامل تھی۔

واضح رہے کہ رواں سال ان بین الاقوامی فلم ایوارڈز کے لیے پاکستان کی دو فلموں ’’میرا لیاری‘‘ اور ’’ویلکم ٹو پنجاب‘‘ کو نامزد کیا گیا تھا۔ ماسکو میں منعقدہ اس رنگا رنگ تقریب میں دنانیر مبین کی بہترین اداکارہ کے طور پر کامیابی کو پاکستانی فلم انڈسٹری اور شوبز حلقوں کے لیے ایک بڑا اور اہم بین الاقوامی اعزاز قرار دیا جا رہا ہے۔