شارجہ: بچوں کو ماحولیات اور شہری ذمہ داریوں سے آگاہی کیلئے 3 منفرد کتابیں متعارف

شارجہ انٹرنیشنل بک فیئر کے 45 ویں ایڈیشن کے دوران ایکسپو سینٹر شارجہ میں کم عمر قارئین کے لیے ماحولیاتی تحفظ اور شہری ذمہ داریوں پر مبنی تین نئی تصویری کتابوں کی رونمائی کی گئی۔ کلمات گروپ اور دبا الحصن بلدیہ کے اشتراک سے عربی اور انگریزی میں تیار کردہ اس سلسلے ’’فرینڈز آف دبا الحصن میونسپلٹی‘‘ کی تقریب میں شارجہ کے نائب حکمران شیخ ڈاکٹر سلطان بن احمد القاسمی، کلمات گروپ کی بانی شیخہ بدور بنت سلطان القاسمی اور وزیر ثقافت شیخ سالم بن خالد القاسمی سمیت اعلیٰ شخصیات نے شرکت کی۔ مصنفہ مریم الجمال، نورہ الخوری اور نادیہ النجار کی تحریر کردہ یہ کتابیں بچوں کو کہانیوں اور تصاویر کے ذریعے تعمیراتی ضوابط، ساحلوں کی صفائی، سمندری حیات اور شجرکاری کی اہمیت سے روشناس کراتی ہیں۔ منتظمین کے مطابق اس ادبی منصوبے کا مقصد بچوں میں مطالعے کے شوق کے ساتھ ماحول دوست رویوں اور اجتماعی ذمہ داری کا شعور بیدار کرنا ہے۔