محمود خان اچکزئی، اسد قیصر اور بیرسٹر گوہر کی اہم ملاقات

قائدِ حزبِ اختلاف قومی اسمبلی محمود خان اچکزئی سے سابق اسپیکر اسد قیصر، پی ٹی آئی چیئرمین بیرسٹر گوہر خان اور ترجمان حسین احمد یوسفزئی نے اہم ملاقات کی، جس میں بانی پی ٹی آئی عمران خان اور ان کی بہنوں کی صحت اور گرفتاریوں پر شدید تشویش کا اظہار کیا گیا۔ تحریکِ تحفظِ آئین پاکستان کے اعلامیے کے مطابق شرکاء نے سپریم کورٹ کے 18 اگست کے فیصلے کے تحت عمران خان کو فوری طور پر شفاء ہسپتال اسلام آباد منتقل کرنے، نامزد وکلاء کو ملاقات کی اجازت دینے اور ایم پی او کے تحت نظر بند علیمہ خان، عظمیٰ خان اور نورین نیازی سمیت کے پی کے کے منتخب نمائندوں کی فوری رہائی کا مطالبہ کیا۔ اجلاس میں وفاقی آئینی عدالت کی جانب سے پشاور ہائی کورٹ کو گورنر راج و ایم پی او مقدمات کی سماعت سے روکنے کو لاقانونیت قرار دیتے ہوئے آئینی عدالت میں پٹیشن دائر کرنے کا فیصلہ بھی کیا گیا۔