پاکستان اور تاتارستان کا تجارتی و اقتصادی تعاون بڑھانے، مشترکہ منصوبوں پر غور

روس میں پاکستان کے سفیر فیصل نیاز ترمذی نے تاتارستان کے دارالحکومت کازان میں تاتارستان انویسٹمنٹ ڈیولپمنٹ ایجنسی کی اعلیٰ قیادت سے ملاقات کے دوران پاکستان اور روسی جمہوریہ تاتارستان کے مابین تجارتی و معاشی تعلقات کو فروغ دینے پر زور دیا ہے۔ انہوں نے واضح کیا کہ پاکستان دوستانہ روابط کو عملی اقتصادی تعاون اور مشترکہ سرمایہ کاری میں تبدیل کرنے کے لیے مکمل طور پر تیار ہے۔ سفیر پاکستان نے سابق وزیراعظم نواز شریف کے دورۂ تاتارستان اور تاتارستان کے سربراہ رستم منیخانوف کے دورۂ پاکستان کا حوالہ دیتے ہوئے کہا کہ اعلیٰ سطح کے ان دوروں نے تعلقات کی مضبوط بنیاد رکھی ہے۔ انہوں نے مشترکہ کاروباری منصوبوں، بی ٹو بی (B2B) اور عوام کے درمیان روابط (P2P) کے فروغ کو کلیدی قرار دیا۔ اپنے دورے میں سفیر پاکستان نے بین الاقوامی ثقافتی میلے ‘روس مشرق’ اور عوامی سفارت کاری کی گول میز کانفرنس میں بھی شرکت کی۔