شارجہ کتاب میلے میں جاسوس کونان کی انٹری، پراسرار چوری نے شائقین کو حیران کر دیا

شارجہ انٹرنیشنل بک فیئر 2026ء میں بچپن کے مقبول کارٹون کرداروں نے ایک بار پھر شائقین کو سحر انگیز کر دیا۔ ’’جب یادیں گنگناتی ہیں‘‘ کے عنوان سے پیش کیے گئے منفرد تھیٹر اور میوزیکل شو میں مشہور جاسوس کونان، توغوموری اور الفریڈو کے کردار ایک ہی اسٹیج پر جلوہ گر ہوئے، جبکہ ایک پراسرار چوری کی کہانی نے شائقین کو حیران کر دیا۔

شارجہ بک اتھارٹی کے مطابق اس خصوصی شو میں مزاح، سنسنی، موسیقی اور بچپن کی یادوں کا حسین امتزاج پیش کیا گیا۔ شو کی سب سے اہم پیش رفت یہ تھی کہ ان معروف کارٹون کرداروں کو انہی کے اصل عربی ڈبنگ صداکاروں آمال سعدالدین (جاسوس کونان)، مروان فرحات (توغوموری) اور بثینہ شیا (الفریڈو) نے اسٹیج پر لائیو ادا کیا۔ کہانی میں تفتیش کے دوران حاضرین کی نشستوں کے نیچے 10 مختلف اشاروں والے لفافے رکھے گئے تھے جن کے ذریعے شائقین نے بھی عملی طور پر کیس حل کرنے میں حصہ لیا۔

شو کے دوسرے حصے میں معروف فنکار عاصم سکر نے ‘ڈریگن بال’ اور ‘ابطال الدیجیتال’ جیسے مقبول کارٹون پروگراموں کے 23 گانے لائیو پیش کیے۔ ڈرامے کا اختتام ایک انتہائی جذباتی موڑ پر ہوا جس میں یہ انکشاف کیا گیا کہ اصل چور کوئی انسان نہیں بلکہ “گزرتا ہوا وقت” تھا اور چوری ہونے والی چیز “بچپن کی خوبصورت یادیں” تھیں۔