پولیو کے خلاف مہم سے خواتین کے حقوق تک: آٹھ پاکستانی نوجوانوں کے لیے ڈیانا ایوارڈ

سماجی فلاح و بہبود اور انسانی ہمدردی کے شعبوں میں نمایاں خدمات کے اعتراف میں 8 پاکستانی نوجوانوں کو برطانیہ کے معتبر ‘ڈیانا ایوارڈ برائے 2026’ سے نوازا گیا ہے۔ اس سال دنیا بھر کے 44 ممالک سے منتخب کردہ 198 نوجوانوں میں سارہ علی (بانی پاکستان پولیو پروجیکٹ)، اریبہ سلیمان (شی رائز پاکستان)، مریم رحمان (پرو جسٹس پروجیکٹ)، محمد ابراہیم، علی اذان احمد منج، نور عبدالغنی، ریا یاسر خواجہ اور وشال پرکاش شامل ہیں۔ ان نوجوانوں نے پولیو سے آگاہی، لڑکیوں کی تعلیم، مفت قانونی معاونت، سیلاب متاثرین کی ڈیجیٹل نقشہ سازی، صحت عامہ، سٹیم (STEM) تعلیم کی فراہمی اور خواتین کو معاشی طور پر بااختیار بنانے جیسے اہم منصوبوں کی قیادت کی۔ ڈیانا ایوارڈ کی چیف ایگزیکٹیو ڈاکٹر ٹیسی اوجو نے ایوارڈ یافتگان کو سراہتے ہوئے کہا کہ یہ نوجوان دنیا کے سنگین مسائل کے حل کے لیے عزم اور مثبت تبدیلی کی علامت ہیں۔