گورنر پنجاب کا اٹک میں شہید بینظیر بھٹو ڈائیلاسس اینڈ بلڈ بینک کا افتتاح

گورنر پنجاب سردار سلیم حیدر خان نے اٹک کی تحصیل جنڈ میں ‘شہید بینظیر بھٹو ڈائیلاسسز اینڈ بلڈ بینک’ کا باقاعدہ افتتاح کر دیا ہے، جہاں ابتدائی طور پر 6 ڈائیلاسسز مشینیں نصب کی گئی ہیں تاکہ مقامی مریضوں کو ان کی دہلیز پر گردوں کے علاج کی مفت سہولت میسر آ سکے۔ افتتاحی تقریب سے خطاب کرتے ہوئے گورنر پنجاب نے کہا کہ محض لاہور میں بیٹھ کر پورے پنجاب کی ترقی کا دعویٰ کرنا درست نہیں کیونکہ صوبے کے دور دراز علاقوں میں اب بھی صحت اور دیگر بنیادی سہولیات سے متعلق سنجیدہ مسائل موجود ہیں۔ انہوں نے نشاندہی کی کہ پینے کے آلودہ پانی کی وجہ سے عوام گردوں کی بیماریوں سمیت مختلف عوارض کا شکار ہو رہے ہیں، اس لیے صاف پانی کی فراہمی اور بنیادی طبی ڈھانچے کی بہتری پر ہنگامی بنیادوں پر کام کرنا ہوگا۔ یہ نیا طبی مرکز اٹک اور گرد و نواح کے ان مریضوں کے لیے ایک اہم سہولت ثابت ہوگا جنہیں باقاعدگی سے ڈائیلاسسز کی ضرورت رہتی ہے۔