ویکسین خریداری میں مبینہ اربوں روپے کی کرپشن، گرفتار ملزم کا جوڈیشل ریمانڈ منظور

ویکسین کی خریداری میں اربوں روپے کی مبینہ کرپشن کے کیس میں اہم پیش رفت سامنے آئی ہے، جہاں عدالت نے کراچی سے گرفتار ملزم عثمان کو 14 روزہ جوڈیشل ریمانڈ پر جیل بھیجنے کا حکم دے دیا ہے۔ فیڈرل انویسٹی گیشن ایجنسی (ایف آئی اے) نے 7 روزہ جسمانی ریمانڈ مکمل ہونے پر ملزم کو ڈسٹرکٹ اینڈ سیشن کورٹ میں جوڈیشل مجسٹریٹ کے روبرو پیش کیا اور عدالت نے ایف آئی اے کو جلد مقدمے کا چالان جمع کروانے کی ہدایت بھی جاری کر دی، جبکہ کیس کے دیگر نامزد ملزمان پہلے ہی جوڈیشل ریمانڈ پر جیل میں موجود ہیں۔ ملزمان پر ویکسین کے 5 سالہ ٹھیکے میں من پسند کمپنی کو فائدہ پہنچانے اور سنگین مالی بے ضابطگیوں کے ذریعے قومی خزانے کو تقریباً 2 ارب 44 کروڑ 50 لاکھ روپے کا نقصان پہنچانے کا الزام ہے۔