پرائیویٹ عازمین حج کے لیے خوشخبری، کوئی بھی حاجی محروم نہیں ہوگا

پرائیویٹ حج آپریٹرز کے زیرِ انتظام عازمین حج کے لیے خوشخبری سامنے آ گئی ہے۔ اس سال کوئی بھی پرائیویٹ حاجی حج سے محروم نہیں رہے گا، کیونکہ تمام عازمین کی بکنگ مقررہ ڈیڈ لائن سے قبل مکمل کر لی گئی ہے۔

ذرائع کے مطابق حج آرگنائزرز نے عازمین کی 100 فیصد رقوم سعودی عرب منتقل کر دی ہیں، جبکہ رہائش، کھانے پینے اور دیگر تمام سروسز کی ادائیگیاں بھی مکمل ہو چکی ہیں۔ پرائیویٹ عازمین کے لیے منیٰ میں بھی رہائش کی بکنگ کرالی گئی ہے۔

واضح رہے کہ گزشتہ سال رقوم بروقت منتقل نہ ہونے کے باعث 63 ہزار عازمین حج سے محروم رہ گئے تھے۔ حکومت نے اس سال نجی حج آپریٹرز کو 31 دسمبر کی ڈیڈ لائن دی تھی، جس پر مکمل عملدرآمد کیا گیا۔

چیئرمین ہوپ ناصر خان نے بھی پرائیویٹ عازمین حج کی ادائیگیوں کی تصدیق کرتے ہوئے صورتحال کو تسلی بخش قرار دیا ہے۔