9 مئی ریڈیو پاکستان حملہ کیس: کامران بنگش اور تیمور جھگڑا کی عبوری ضمانتوں میں توسیع، سماعت معطل

انسداد دہشت گردی پشاور کی عدالت نے 9 مئی کو ریڈیو پاکستان پر حملے سے متعلق کیس کی سماعت کے دوران پاکستان تحریک انصاف کے رہنماؤں کامران بنگش، تیمور سلیم جھگڑا اور عرفان کی عبوری ضمانتوں میں توسیع کر دی ہے۔ کیس کی سماعت انسداد دہشت گردی عدالت کے جج ولی محمد خان نے کی، جہاں کامران بنگش سمیت دیگر وکلاء پیش ہوئے۔ تفتیشی افسر کی جانب سے تمام ملزمان کا ضمنی چالان عدالت میں جمع کرایا گیا، جبکہ جج کے استفسار پر درخواست گزار کے وکیل نے آگاہ کیا کہ کیس میں نامزد عامر چمکنی کو گزشتہ شب گرفتار کیا جا چکا ہے۔ وکلاء صفائی نے عدالت سے استدعا کی کہ انہیں کیس کی تفصیلات کے مطالعے کے لیے وقت دیا جائے اور آگاہ کیا کہ سہیل آفریدی کا معاملہ پشاور ہائیکورٹ میں بھی زیرِ سماعت ہے۔ بعد ازاں عدالت نے ریڈیو پاکستان کے وکیل شبیر گیگیانی کے آنے تک سماعت ملتوی کر دی۔