اسلام آباد بلدیاتی انتخابات: اب تک صرف 39 امیدواروں نے کاغذات نامزدگی جمع کرائے

اسلام آباد میں بلدیاتی انتخابات 2026ء کے لیے الیکشن کمیشن کی جانب سے جاری کردہ شیڈول کے تحت کاغذات نامزدگی جمع کرانے کا عمل جاری ہے، تاہم امیدواروں کی جانب سے فی الوقت سست روی کا مظاہرہ دیکھا جا رہا ہے۔ الیکشن کمیشن کی رپورٹ کے مطابق 3 نومبر تک 1,665 کاغذات نامزدگی جاری کیے گئے جن میں سے گزشتہ شام تک محض 39 امیدواروں نے اپنے کاغذات جمع کرائے ہیں۔ اسلام آباد کی 125 یونین کونسلز کے لیے 16 ریٹرننگ افسران کاغذات وصول کر رہے ہیں، جبکہ کاغذات نامزدگی کی آخری تاریخ 6 نومبر مقرر کی گئی ہے۔ انتخابی شیڈول کے مطابق جانچ پڑتال کا مرحلہ 9 سے 13 نومبر تک مکمل ہوگا اور اپیلوں پر فیصلوں کے بعد 26 نومبر کو انتخابی نشانات الاٹ کیے جائیں گے۔ اسلام آباد میں 2015 کے قانون کے تحت بلدیاتی انتخابات کے لیے پولنگ 20 دسمبر کو ہوگی جبکہ حتمی نتائج 21 سے 24 دسمبر تک مرتب کیے جائیں گے۔