بلدیاتی اختیارات کے لیے دھرنے جاری، حافظ نعیم الرحمن کا پنجاب کے بلدیاتی قانون پر سخت ردعمل

لاہور سمیت مختلف ڈویژنل ہیڈکوارٹرز پر بلدیاتی حکومتوں کے قیام اور اختیارات کی بحالی کے لیے دھرنے جاری ہیں۔ امیر جماعت اسلامی حافظ نعیم الرحمن نے سوشل میڈیا پلیٹ فارم ایکس پر بیان دیتے ہوئے کہا کہ خصوصاً پنجاب کے کالے بلدیاتی قانون کے خلاف عوامی شعور میں اضافہ ہو رہا ہے۔

حافظ نعیم الرحمن نے الزام عائد کیا کہ حکمران خاندان اپنی اجارہ داری قائم رکھنے کے لیے صوبے کے تمام اداروں پر قبضہ کر لیتے ہیں، دس دس سال تک بلدیاتی انتخابات نہیں کراتے اور جب دباؤ میں آکر اعلان کرنا پڑے تو تمام اختیارات چھین لیے جاتے ہیں، جو آئین کی کھلی خلاف ورزی ہے۔

انہوں نے کہا کہ پنجاب میں یونین کونسل چیئرمین کا انتخاب بھی براہ راست عوام کے ووٹوں سے نہیں ہوگا، غیر جماعتی بنیادوں پر کونسلرز منتخب کیے جائیں گے اور بعد ازاں دولت اور دباؤ کے ذریعے انہیں اپنی پارٹی میں شامل کروایا جائے گا۔

امیر جماعت اسلامی نے اعلان کیا کہ 15 جنوری سے پورے ملک میں “بدل دو نظام” ریفرنڈم شروع کیا جائے گا اور عوام کے حقوق کے لیے جدوجہد جاری رہے گی