2050ء تک دنیا بھر میں کینسر کے کیسز میں 20.2 فیصد، اموات میں 39.3 فیصد اضافے کا خدشہ

آسٹریلوی اور بین الاقوامی محققین کی ایک جامع عالمی تحقیق میں انکشاف کیا گیا ہے کہ اگر موجودہ رجحانات برقرار رہے تو 2050ء تک دنیا بھر میں سروائیکل کینسر (رحم کے منہ کے کینسر) کے نئے کیسز میں 20.2 فیصد جبکہ اس بیماری سے ہونے والی سالانہ اموات میں 39.3 فیصد کا تشویشناک اضافہ ہو سکتا ہے۔

معروف طبی جریدے ‘نیچر میڈیسن’ (Nature Medicine) میں شائع ہونے والی اس رپورٹ کے لیے سائنسدانوں نے 1990ء سے 2023ء تک دنیا کے 204 ممالک اور علاقوں کے ڈیٹا کا تفصیلی جائزہ لیا۔ تحقیق کے مطابق سال 2023ء کے دوران عالمی سطح پر سروائیکل کینسر کے تقریباً 8 لاکھ 87 ہزار نئے کیسز رپورٹ ہوئے جبکہ 3 لاکھ 69 ہزار خواتین لقہِ اجل بنیں۔ ماہرین کے تخمینے کے مطابق 2050ء تک نئے سالانہ کیسز کی تعداد بڑھ کر 10 لاکھ 80 ہزار اور اموات کی تعداد 5 لاکھ 22 ہزار تک پہنچ جائے گی۔

رپورٹ میں خاص طور پر سب صحارا افریقہ (Sub-Saharan Africa) کو سب سے زیادہ متاثرہ خطہ قرار دیا گیا ہے، جہاں 2050ء تک کیسز میں 88.7 فیصد اور اموات میں 95.4 فیصد کا ہولناک اضافہ متوقع ہے۔ محققین نے انتباہ جاری کیا ہے کہ سہولیات میں تفاوت کے باعث دنیا کے 7 جائزہ شدہ خطوں میں سے کوئی بھی 2050ء تک عالمی ادارہ صحت (WHO) کے طے کردہ کینسر کے خاتمے کے ہدف حاصل نہیں کر سکے گا۔ ماہرین نے ہیومن پیپیلوما وائرس (HPV) ویکسینیشن اور بروقت سکریننگ کو یقینی بنانے پر زور دیا ہے۔