ایوی ایشن کی دنیا کا منفرد واقعہ، کینیا سے خصوصی پرواز میں 50 گائیوں کا لاگوس تک سفر

کینیا کی قومی ایئرلائن ‘کینیا ایئروویز’ کے کارگو ڈویژن نے ایک غیرمعمولی اور منفرد فضائی آپریشن کے تحت اعلیٰ نسل کی دودھ دینے والی 50 سے زائد گائیوں کو خصوصی چارٹرڈ پرواز کے ذریعے کینیا سے نائیجیریا پہنچا دیا ہے۔

ایئرلائن نے اس انوکھی پرواز کو مزاحیہ انداز میں ‘وی آئی پی کیٹل’ (VIP Cattle) کا نام دیا، جس کے تحت گائیوں کو کینیا کے الدورت ایئرپورٹ سے بڑے آہنی جنگلوں میں ڈال کر طیارے میں سوار کیا گیا۔ یہ خصوصی چارٹرڈ پرواز ان خاص مویشیوں کو لے کر نائیجیریا کے دارالحکومت لاگوس پہنچی۔ ایئرلائن کارگو نے سوشل میڈیا پر اپنے پیغام میں لکھا کہ ‘ٹریفک کو راستہ دیں! ہمارے وی آئی پی مویشی ہری بھری چراگاہوں کی تلاش میں آسمان کا سفر کر رہے ہیں’۔ ایئرلائن نے جانوروں کی محفوظ منتقلی کے لیے اپنی خصوصی ‘لائیو اینمل ٹرانسپورٹیشن’ سروس پر بھروسہ کرنے پر اپنے عملے اور کلائنٹ کا خصوصی شکریہ بھی ادا کیا۔

یہ اعلیٰ نسل کی گائیں کینیا کے کاؤنٹی اواسن گیشو کے چھوٹے فارمز سے حاصل کی گئی تھیں، جو بہترین نسل کے مویشیوں کے لیے بین الاقوامی شہرت رکھتے ہیں۔ نائیجیریا بھیجی جانے والی ان گائیوں میں ‘آئیرشائر ہائفرز’ شامل ہیں جو پہلے سے حاملہ اور مشرقی افریقا کی بہترین جینیاتی خصوصیات کی حامل مانی جاتی ہیں۔ ان قیمتی جانوروں کو نائیجیریا بھیجنے کا بنیادی مقصد وہاں دودھ کی مقامی پیداوار میں نمایاں اضافہ کرنا اور مقامی فارمرز کی بھرپور معاونت کرنا ہے۔