اسلام آباد میں بلدیاتی انتخابات 2015 کے قانون کے تحت کرانے کا حکم

الیکشن کمیشن آف پاکستان نے اسلام آباد میں بلدیاتی انتخابات 2015ء کے بلدیاتی قانون کے تحت کرانے کا حکم دیتے ہوئے حکام کو انتخابی شیڈول آج ہی جاری کرنے کی ہدایت کر دی ہے۔ چیف الیکشن کمشنر سکندر سلطان راجہ کی سربراہی میں پانچ رکنی کمیشن نے سماعت کے بعد مختصر حکمنامہ پڑھ کر سنایا۔ سماعت کے دوران چیف الیکشن کمشنر نے حکومت کی جانب سے بارہا یقین دہانیوں کے باوجود قواعد و ضوابط اور نیا قانون نہ بنانے پر شدید برہمی کا اظہار کرتے ہوئے ریمارکس دیے کہ ایسا لگتا ہے حکومت انتخابات کرانا ہی نہیں چاہتی، تاہم آئینی ذمہ داری پوری کرنے کے لیے الیکشن کمیشن مجبوراً یہ حکم دے رہا ہے۔ اسپیشل سیکرٹری الیکشن کمیشن نے بتایا کہ صدارتی آرڈیننس کی مدت ختم ہونے اور نیا قانون نہ بننے کے باعث 2015ء کے قانون کے تحت ہی انتخابات کا انعقاد ممکن ہے۔