اسحاق ڈار سے صدر مالدیپ کی ملاقات، مختلف شعبوں میں تعاون بڑھانے پر اتفاق

نائب وزیراعظم و وزیر خارجہ اسحاق ڈار سے مالدیپ کے صدر ڈاکٹر محمد معیزو نے اسلام آباد میں باضابطہ ملاقات کی ہے، جس کے دوران دونوں ممالک نے تجارت، سرمایہ کاری، تعلیم، موسمیاتی تبدیلی اور سیاحت کے شعبوں میں تعاون مزید بڑھانے پر اتفاق کیا۔ ترجمان دفتر خارجہ کے مطابق اسحاق ڈار نے مالدیپ کے صدر اور ان کے وفد کا خیرمقدم کرتے ہوئے صدر مملکت اور وزیراعظم پاکستان کی جانب سے نیک خواہشات کے پیغامات پہنچائے اور دیرینہ برادرانہ تعلقات کو مستحکم بنانے کے عزم کا اعادہ کیا۔ انہوں نے مالدیپ-پاکستان بزنس فورم میں تجارتی وفد کی شرکت کو بھی سراہا، جبکہ صدر ڈاکٹر محمد معیزو نے پاکستان کی جانب سے کی جانے والی گرمجوش مہمان نوازی کا شکریہ ادا کیا۔