لبنان میں اقوام متحدہ کی امن فوج کا سرگرمیاں جاری رکھنے کا اعلان

لبنان میں تعینات اقوامِ متحدہ کی عبوری امن فوج (UNIFIL) نے اعلان کیا ہے کہ اقوامِ متحدہ کی سلامتی کونسل کی جانب سے مشن کے اختتامی فریم ورک اور انخلا کے انتظامات پر غور کے باوجود خطے میں امن و استحکام کی بحالی کے لیے ان کی اپریشنل سرگرمیاں بلا تعطل جاری ہیں۔

یونیفل (UNIFIL) کے ترجمان کے مطابق امن فورس اقوامِ متحدہ کی سلامتی کونسل کی قرارداد 1701 کے تحت تفویض کردہ تمام تر ذمہ داریاں ادا کر رہی ہے، جن میں دونوں جانب کی خلاف ورزیوں کی مانیٹرنگ، کشیدگی میں کمی کے لیے فریقین سے رابطہ کاری، لبنانی مسلح افواج کی معاونت اور متاثرہ علاقوں میں انسانی بنیادوں پر امدادی سرگرمیوں کو ممکن بنانا شامل ہے۔

واضح رہے کہ سلامتی کونسل نے اگست 2025ء میں ایک تاریخی فیصلہ کرتے ہوئے یونیفل کے مینڈیٹ کو 31 دسمبر 2026ء تک حتمی طور پر ختم کرنے کی منظوری دی تھی، جس کے تحت اگلے ایک سال کے دوران لبنان سے بین الاقوامی امن فوج کا مرحلہ وار، محفوظ اور مربوط انخلا مکمل کیا جائے گا۔