ماہ رنگ بلوچ اور دیگر کی ضمانتوں کا کیس: سپریم کورٹ نے مقدمات دیگر کیسز کے ساتھ منسلک کر دیے

سپریم کورٹ آف پاکستان نے بلوچ رہنماؤں ماہ رنگ بلوچ، بیبراج بلوچ اور بیبو کی درخواستِ ضمانت پر سماعت کرتے ہوئے کیس کو ملزمان کے خلاف قائم دیگر مقدمات کے ساتھ منسلک کر دیا ہے۔ جسٹس محمد علی مظہر کی سربراہی میں قائم تین رکنی بینچ نے کیس کی سماعت کی، جہاں عدالت نے آبزرویشن دی کہ دیگر مقدمات بھی اسی نوعیت کے مقرر تھے لہٰذا تمام مقدمات کو ایک ساتھ ہی سنا جائے گا۔ عدالتِ عظمیٰ نے پراسیکیوشن کو ہدایت کی کہ وہ جو بھی شواہد اور دستاویزات جمع کروانا چاہتی ہے جمع کروا دے، جس کے بعد کیس کی مزید سماعت غیر معینہ مدت کے لیے ملتوی کر دی گئی۔