سندھ میں انسدادِ دہشتگردی عدالت کے ججز کی برطرفی کا نوٹیفکیشن کالعدم قرار

وفاقی آئینی عدالت نے انسدادِ دہشت گردی عدالت کے جج محمد یامین کی اپیل منظور کرتے ہوئے سندھ حکومت کی جانب سے ججز کو عہدوں سے ہٹانے کا نوٹیفکیشن اور سندھ ہائیکورٹ کا 22 دسمبر 2025ء کا فیصلہ کالعدم قرار دے دیا ہے۔ جسٹس محمد کریم خان آغا کی جانب سے جاری تحریری فیصلے میں طے کیا گیا ہے کہ ‘سندھ اینٹی ٹیررازم ترمیمی ایکٹ 2025’ کے تحت مقرر کردہ 65 سال کی بالائی عمر کی حد کا اطلاق ماضی سے نہیں کیا جا سکتا اور ترمیمی ایکٹ سے قبل مقررہ مدت کے لیے تعینات ججز اپنے عہدے کی مدت مکمل کریں گے۔ عدالت نے واضح کیا کہ قانونی طور پر حاصل شدہ حقوق کو کسی نئی قانون سازی کے ذریعے ماضی سے لاگو کر کے ختم نہیں کیا جا سکتا، جس کے تحت جج محمد یامین اے ٹی سی-IV کراچی میں اپنی ڈھائی سالہ مدت مکمل کریں گے۔