مالدیپ کے صدر کے اعزاز میں وزیراعظم ہاؤس میں استقبالیہ تقریب، گارڈ آف آنر پیش

مالدیپ کے صدر ڈاکٹر محمد معیزو کے اعزاز میں وزیراعظم ہاؤس اسلام آباد میں باضابطہ استقبالیہ تقریب کا انعقاد کیا گیا، جہاں وزیراعظم شہباز شریف نے ان کا پرتپاک استقبال کیا۔ اس موقع پر مسلح افواج کے چاق و چوبند دستے نے معزز مہمان کو گارڈ آف آنر پیش کیا، جبکہ دونوں ممالک کے قومی ترانے بجائے گئے۔ تقریب کے دوران دونوں رہنماؤں نے اپنے متعلقہ وفود اور کابینہ اراکین کا تعارف کرایا۔ مالدیپ کے صدر نے وزیراعظم ہاؤس کے سبزہ زار میں یادگاری پودا بھی لگایا، جس کے بعد دونوں ممالک کی ترقی، پائیدار تعلقات اور عوام کی خوشحالی کے لیے خصوصی دعا کی گئی۔