سہ فریقی ون ڈے سیریز، سلو اوور ریٹ پر پاکستان اور سری لنکا پر جرمانہ

پاکستان اور سری لنکا کی کرکٹ ٹیموں پر سہ فریقی ون ڈے سیریز کے افتتاح میں سلو اوور ریٹ کی خلاف ورزی پر انٹرنیشنل کرکٹ کونسل (ICC) کی جانب سے مالی جرمانہ عائد کر دیا گیا ہے۔

انٹرنیشنل کرکٹ کونسل کے مطابق پنڈی کرکٹ اسٹیڈیم راولپنڈی میں کھیلے گئے سیریز کے پہلے ون ڈے میچ میں سلو اوور ریٹ پر پاکستان کرکٹ ٹیم پر میچ فیس کا 10 فیصد جبکہ سری لنکن ٹیم پر 5 فیصد جرمانہ عائد کیا گیا ہے۔ آئی سی سی میچ آفیشلز کے مطابق قومی ٹیم نے مقررہ وقت میں اپنے مقررہ کوٹے سے 2 اوورز جبکہ سری لنکن ٹیم نے 1 اوور کم کرایا تھا۔

پاکستانی ٹیم کے کپتان شاہین شاہ آفریدی اور سری لنکا کے کپتان کوشل مینڈس نے آئی سی سی میچ ریفری کے سامنے اپنی غلطی اور سلو اوور ریٹ کی خلاف ورزی کا اعتراف کرتے ہوئے عائد کردہ جرمانے کو قبول کر لیا ہے، جس کے بعد اس معاملے پر کسی باقاعدہ سماعت کی ضرورت پیش نہیں آئی۔