بیشتر افراد کی پسندیدہ غذا جو دماغی نقصان اور فالج کا خطرہ بڑھاتی ہے

کینیڈا کی میک ماسٹر یونیورسٹی اور ہیملٹن ہیلتھ سائنسز کی ایک مشترکہ طبی تحقیق میں یہ تشویشناک انکشاف سامنے آیا ہے کہ جو افراد روزمرہ زندگی میں الٹرا پراسیس غذاؤں کا باقاعدگی سے استعمال کرتے ہیں، ان کے دماغ کو شدید نقصان پہنچنے اور مستقبل میں فالج (Stroke) و دماغی تنزلی کا شکار ہونے کا خطرہ 40 فیصد تک بڑھ جاتا ہے۔ طبی مجلے ’جاما نیٹ ورک‘ میں شائع ہونے والی اس تحقیق میں 35 سے 69 سال کی عمر کے 9 ہزار ایسے افراد کے دماغی ایم آر آئی (MRI) اسکینز اور ان کی غذائی عادت کا جائزہ لیا گیا جنہیں پہلے سے کوئی دل کا مرض لاحق نہیں تھا۔

محققین نے بتایا کہ الٹرا پراسیس غذائیں، جیسے کہ فاسٹ فوڈز، پیک شدہ ڈبل روٹی، انسٹن بارز و نوڈلز، میٹھے مشروبات، کیک، اور چکن نگٹس وغیرہ، تیاری کے دوران متعدد بار پراسیس کی جاتی ہیں اور ان میں نمک، چینی، اور مصنوعی کیمیکلز کی مقدار حد سے زیادہ جبکہ فائبر اور دیگر غذائی اجزا نہ ہونے کے برابر ہوتے ہیں۔ تحقیق کے مطابق جو افراد ایسی غذائیں زیادہ کھاتے ہیں، ان میں جسمانی چربی اور توند بڑھ جاتی ہے، جس کے نتیجے میں شریانوں میں اندرونی ورم پیدا ہوتا ہے اور دماغ کو خون کی فراہم متاثر ہوتی ہے۔ حیران کن طور پر مریض بظاہر خود کو مکمل صحت مند محسوس کرتے ہیں جبکہ خاموشی سے ان کے دماغ کو ناقابلِ تلافی نقصان پہنچ چکا ہوتا ہے۔