امریکی پابندیوں کے باوجود عالمی فوجداری عدالت انسانی حقوق ایوارڈ کے لیے نامزد

امریکی پابندیوں کے دباؤ کا سامنا کرنے والی عالمی فوجداری عدالت (ICC) کو پیر کے روز یورپی یونین کے اعلیٰ ترین انسانی حقوق اعزاز ‘سخاروف پرائز’ (Sakharov Prize) کے لیے 3 حتمی امیدواروں میں شامل کر لیا گیا ہے۔ یورپی پارلیمنٹ کی جانب سے نیدرلینڈز کے شہر دی ہیگ میں قائم اس عدالت کی نامزدگی کو بین الاقوامی قوانین اور عالمی انصاف کے نظام کی بھرپور حمایت کے طور پر دیکھا جا رہا ہے۔

ایوارڈ کی دو دیگر فائنلسٹ نامزدگیوں میں تنزانیہ کے اپوزیشن رہنما ٹنڈو لیسو اور ایرانی حکومت کے خلاف کارروائیوں کا سامنا کرنے والی جڑواں بہنیں ترانہ رحیمی اور رومینا رحیمی شامل ہیں۔ 1988ء میں قائم کیا جانے والا یہ ایوارڈ سابق سوویت رہنما آندرے سخاروف کے نام سے منسوب ہے، جو ہر سال انسانی حقوق اور جمہوریت کے فروغ کے لیے جدوجہد کرنے والی شخصیات یا تنظیموں کو دیا جاتا ہے۔

واضح رہے کہ امریکی صدر ڈونلڈ ٹرمپ کی انتظامیہ نے حال ہی میں عالمی فوجداری عدالت پر شدید مالی و انتظامی پابندیاں عائد کی ہیں اور عدالت کو مفلوج کرنے کا عزم ظاہر کیا ہے، جس کی بنیادی وجہ آئی سی سی کے ججوں کی جانب سے غزہ میں جنگی جرائم پر اسرائیلی وزیراعظم بنیامین نتن یاہو کے وارنٹ گرفتاری جاری کرنا ہے۔