بنگلہ دیش میں خسرے کی وبا شدت اختیار کر گئی، 2 لاکھ 2 ہزار مشتبہ کیسز رپورٹ

بنگلہ دیش میں خسرے (Measles) کی وبائی صورتِ حال انتہائی تشویشناک حد تک شدت اختیار کر گئی ہے، جہاں رواں سال اب تک 2 لاکھ 2 ہزار سے زائد مشتبہ کیسز رپورٹ ہوئے ہیں، جن میں سے 22 ہزار کیسز کی باضابطہ لیبارٹری سے تصدیق کی جا چکی ہے۔

عالمی ادارہ صحت (WHO) کے مطابق اس مہلک بیماری سے اب تک 1,147 افراد جان کی بازی ہار چکے ہیں، جن میں 94 فیصد پانچ سال سے کم عمر کے معصوم بچے شامل ہیں۔ ماہرینِ صحت نے خبردار کیا ہے کہ ملک میں ویکسی نیشن کی شرح میں مسلسل کمی، حفاظتی ٹیکوں کی مہمات میں درپیش خامیاں اور دور دراز علاقوں تک طبی سہولیات کی رسائی نہ ہونے کے باعث اس وبا پر قابو پانے میں شدید مشکلات پیش آ رہی ہیں۔

عالمی ادارے کا کہنا ہے کہ سال 2025ء میں بنگلہ دیش میں خسرے کی ویکسین کی پہلی خوراک کی کوریج گھٹ کر 90 فیصد اور دوسری خوراک کی کوریج 86 فیصد تک گر گئی تھی، جبکہ بیماری کے پھیلاؤ کو روکنے کے لیے کم از کم 95 فیصد کوریج انتہائی ضروری ہے۔ اگرچہ رواں سال اپریل اور مئی کے دوران تقریباً 2 کروڑ بچوں کو ایمرجنسی ویکسین لگائی گئی، تاہم اس کے بعد کیسز میں دوبارہ خطرناک اضافہ دیکھا گیا۔ ماہرین نے متنبہ کیا ہے کہ بنگلہ دیش کی یہ صورتِ حال دیگر ممالک کے لیے بھی ایک بڑا انتباہ ہے کہ حفاظتی ٹیکوں کے نظام میں غفلت بچوں کے لیے کتنا بڑا خطرہ بن سکتی ہے۔