امریکی و اسرائیلی حملے کھلی جارحیت، اسلام آباد مفاہمت بحال کی جائے: چینی وزیراعظم

چینی وزیراعظم لی چیانگ نے ایران پر امریکی اور اسرائیلی حملوں کی سخت الفاظ میں مذمت کرتے ہوئے انہیں کھلی جارحیت قرار دیا ہے اور مؤقف اختیار کیا ہے کہ تنازع کے حل کے لیے ‘اسلام آباد مفاہمت’ (Islamabad Accord) کی بحالی اور سفارتی راستے کا انتخاب ضروری ہے۔

تاجکستان کے دارالحکومت دوشنبے میں شنگھائی تعاون تنظیم (SCO) کے رکن ممالک کے وزرائے اعظم کے اجلاس کے موقع پر ایرانی نائب صدر سے اہم ملاقات کے دوران چینی وزیراعظم نے کہا کہ ایران کے خلاف یہ کارروائیاں جاری مذاکراتی عمل کے دوران اور اقوامِ متحدہ کی سلامتی کونسل کی منظوری کے بغیر کی گئیں جو کہ بین الاقوامی قوانین کی خلاف ورزی ہے۔ انہوں نے واضح کیا کہ چین، امریکا کی جانب سے ایران پر عائد کی جانے والی یکطرفہ اقتصادی پابندیوں کی بھی شدید مخالفت کرتا ہے۔

وزیراعظم لی چیانگ نے اسلام آباد معاہدے کی مکمل بحالی کی حمایت کا اعادہ کرتے ہوئے کہا کہ بیجنگ عالمی فورمز پر ایران کے تمام جائز قومی حقوق اور تحفظ کی مسلسل حمایت جاری رکھے گا۔ ملاقات میں دونوں رہنماؤں نے خطے میں امن و استحکام کے قیام کے لیے باہمی و کثیر الجہتی تعاون کو مزید وسعت دینے پر اتفاق کیا۔