خیبر پختونخوا میں ایکشن پلان تیار، 27 محکموں کیلئے بڑے اقدامات تجویز

خیبر پختونخوا حکومت نے صوبے میں سیاسی، انتظامی اور معاشی استحکام کے ساتھ ساتھ عوامی سہولیات کی فوری فراہمی کے لیے ایک جامع 100 تا 180 روزہ سٹریٹجک ایکشن پلان تیار کر لیا ہے، جس میں 27 مختلف صوبائی محکموں کے لیے 206 اہم اقدامات تجویز کیے گئے ہیں۔

ذرائع کے مطابق اس ایکشن پلان کا بنیادی مقصد ضم شدہ اضلاع سمیت صوبہ بھر میں امن و امان، انتظامی اصلاحات، صحت، تعلیم اور انفراسٹرکچر کو بحال اور مضبوط بنانا ہے۔ منصوبے کے تحت صوبے کی تقریباً 1150 سڑکوں کی مرمت، پشاور رنگ روڈ اور جی ٹی روڈ کی تزئین و آرائش، اور 80 سے زائد پارکوں کی بحالی شامل ہے۔ صحت کے شعبے میں 250 بنیادی مراکزِ صحت میں 24 گھنٹے سہولیات کی فراہمی، ادویات کی 80 فیصد دستیابی اور طبی عملے کی ڈیجیٹل نگرانی تجویز کی گئی ہے۔

تعلیمی اصلاحات کے تحت ڈیڑھ ہزار سکولوں کی حالتِ زار بہتر بنانے اور 7 لاکھ طلبہ کے لیے نئے فرنیچر کی فراہمی کا ہدف رکھا گیا ہے۔ اس کے علاوہ، توانائی کے شعبے میں 65 ہزار مستحق خاندانوں کو شمسی توانائی (Solar Systems) کے لیے رعایتی معاونت، جبکہ نوجوانوں کے لیے بلاسود قرضے اور فنی تربیت کے پروگرام شامل کیے گئے ہیں۔ اس ایکشن پلان کے حتمی نام کے لیے “مستحکم خیبر پختونخوا” اور “خیبر پختونخوا 180 روزہ سٹریٹجک ایکشن پلان” جیسے نام غورِ زیر ہیں۔