امریکا کا ایران سے جوہری پروگرام دوبارہ شروع نہ کرنے کی قابلِ تصدیق ضمانت کا مطالبہ

امریکی نائب صدر جے ڈی وینس نے کہا ہے کہ امریکا ایران کے خلاف جنگ میں فیصلہ کن کامیابی حاصل کر چکا ہے اور ایران کا جوہری پروگرام تباہ کر دیا گیا ہے، تاہم واشنگٹن اب تہران سے اس بات کی طویل مدتی اور قابلِ تصدیق ضمانت کا طلبگار ہے کہ وہ مستقبل میں جوہری پروگرام دوبارہ بحال نہیں کرے گا۔ سی بی ایس نیوز کے پروگرام سے خطاب کرتے ہوئے انہوں نے کہا کہ امریکی انتظامیہ کی اصل توجہ اس امر کو یقینی بنانا ہے کہ ایران آنے والے برسوں میں جوہری ہتھیاروں یا یورینیم افزودگی کی صلاحیت دوبارہ حاصل نہ کر سکے۔ دوسری جانب ایران روایتی طور پر اپنے جوہری پروگرام کو پُرامن سائنسی و طبی مقاصد کے لیے ناگزیر قرار دیتے ہوئے جوہری ہتھیار بنانے کے ارادے کی تردید کرتا آیا ہے۔