خواجہ آصف نے یوروکریٹس کی بیرونِ ملک ہجرت بارے سوالات اٹھا دیے

وفاقی وزیرِ دفاع خواجہ آصف نے بیوروکریسی کے اعلیٰ عہدوں پر فائز افسران کی جانب سے کینیڈا، امریکہ، برطانیہ اور خصوصاً پرتگال میں مستقل سکونت (PR) اختیار کرنے کی کوششوں پر سخت سوالات اٹھائے ہیں۔ سماجی رابطے کی ویب سائٹ ایکس (X) پر اپنے بیان میں وزیرِ دفاع نے کہا کہ پاکستان کی بیوروکریسی میں ایماندار افسران موجود ہیں، تاہم اہم عہدوں پر فائز اور حکومتی سرپرستی حاصل کرنے والے متعدد افسران دورانِ ملازمت ہی بیرونِ ملک شفٹ ہونے کی منصوبہ بندی کرتے ہیں، جس سے ان کی ملک و قوم کے ساتھ وابستگی پر شک پیدا ہوتا ہے۔ خواجہ آصف نے دعویٰ کیا کہ پی آر کے حصول میں مبینہ سہولت کاری کرنے والا ایک شخص بیوروکریٹس سے بھاری رقم لے کر فرار ہو چکا ہے، لہٰذا حکومت اور ریاست سے مراعات پانے والے ان افسران کے اثاثوں، آمدن اور بیرونِ ملک منتقلی کا شفاف جائزہ لیا جانا چاہیے۔