خیبرپختونخوا کے عوام نے انتشاری ٹولے کو مسترد کردیا: امیر مقام

وفاقی وزیر امورِ کشمیر و گلگت بلتستان انجینئر امیر مقام نے کہا ہے کہ خیبرپختونخوا کے باشعور عوام نے پی ٹی آئی کی انتشاری سیاست اور احتجاجی کال کو مکمل طور پر مسترد کرتے ہوئے ترقی و خوشحالی کا راستہ منتخب کیا ہے۔ سوات میں عوامی جلسے سے خطاب کرتے ہوئے انہوں نے کہا کہ خیبرپختونخوا کسی کے باپ کی جاگیر نہیں، عوام نے تین بار موقع دیا لیکن پی ٹی آئی اقتدار میں آ کر لوٹ مار اور صوبے کو کھنڈر بنانے کے سوا کچھ نہ کر سکی۔ امیر مقام نے واضح کیا کہ خیبرپختونخوا کے بہادر عوام دہشت گردی کے خلاف لازوال قربانیاں دے رہے ہیں اور وفاقی حکومت کے ترقیاتی اقدامات کا خیرمقدم کرتے ہوئے امن و استحکام کے شانہ بشانہ کھڑے ہیں۔