خیبرپختونخوا میں ایمرجنسی اور گورنر راج کا نفاذ مسترد، 11 اکتوبر کو سیاہ دن کے طور پر منایا جائے گا: متحدہ اپوزیشن کا اعلامیہ

قومی اسمبلی میں متحدہ اپوزیشن کی پارلیمانی پارٹی کا اہم اجلاس اپوزیشن لیڈر قومی اسمبلی محمود خان اچکزئی اور سینیٹ میں قائد حزب اختلاف علامہ راجہ ناصر عباس کی مشترکہ زیرِ صدارت منعقد ہوا، جس میں چیئرمین پی ٹی آئی بیرسٹر گوہر علی خان اور جے یو آئی کے سربراہ مولانا فضل الرحمان سمیت دیگر قائدین نے شرکت کی۔ اجلاس کے بعد جاری کردہ اعلامیے میں خیبرپختونخوا میں ایمرجنسی اور گورنر راج کے نفاذ، منتخب حکومت کے خاتمے اور وزیر اعلیٰ سہیل آفریدی سمیت دیگر سیاسی رہنماؤں کی گرفتاریوں کی شدید مذمت کی گئی۔ اجلاس میں مؤقف اپنایا گیا کہ یہ اقدامات صوبے کے عوامی مینڈیٹ اور جمہوری اقدار کے منافی ہیں۔ اس موقع پر مولانا فضل الرحمان نے حکومت کے ساتھ ماضی کی بات چیت سے ایوان کو آگاہ کرتے ہوئے کہا کہ تمام تر مکالمے کے باوجود حکومت نے یکطرفہ اور غیر آئینی قدم اٹھایا۔ متحدہ اپوزیشن نے مطالبہ کیا کہ گورنر راج کا نفاذ فوری واپس لے کر گرفتار رہنماؤں کے بنیادی حقوق اور صوبائی خودمختاری کا تحفظ یقینی بنایا جائے۔