خیبر پختونخوا میں گورنر راج اور ایمرجنسی آئین کے مطابق لگائی گئی: محسن نقوی

وفاقی وزیر داخلہ محسن نقوی نے سینیٹ اجلاس میں اظہارِ خیال کرتے ہوئے واضح کیا ہے کہ وفاقی حکومت نے آئین سے باہر رہ کر کوئی اقدام نہیں کیا، جبکہ خیبر پختونخوا میں گورنر راج اور ایمرجنسی کا نفاذ بھی آئین و قانون کی طے شدہ حدود کے اندر رہ کر کیا گیا ہے۔ محسن نقوی نے چیلنج کرتے ہوئے کہا کہ اگر کسی آئینی شق کی خلاف ورزی ہوئی ہے تو ماہرین اس کی واضح نشاندہی کریں۔ انہوں نے بتایا کہ پارلیمنٹ اور سیاسی قیادت کے ساتھ دہشت گردی کے خلاف مسلسل بات چیت جاری ہے اور سابق اسپیکر اسد قیصر نے بھی تعاون کا یقین دلایا تھا، تاہم خیبر پختونخوا حکومت کا مؤقف اِس سے بالکل مختلف تھا۔ وزیر داخلہ کا کہنا تھا کہ حکومت حالات اس نہج پر لے جانے کی خواہاں نہیں تھی، مگر دہشت گردی کے خلاف جنگ اور ملکی سلامتی کے لیے سیاسی یکجہتی اور آئینی اقدامات لازمی تھے۔