کے پی میں گورنر راج و ایمرجنسی کا معاملہ: جے یو آئی نے مرکزی مجلسِ شوریٰ کا اہم اجلاس طلب کر لیا

خیبر پختونخوا میں گورنر راج اور ایمرجنسی کے نفاذ کی بدلتی ہوئی سیاسی صورتحال کے پیش نظر جمعیت علمائے اسلام (جے یو آئی) نے اپنی مرکزی مجلسِ شوریٰ کا اہم ترین اجلاس طلب کر لیا ہے۔ ترجمان جے یو آئی اسلم غوری کے مطابق یہ اجلاس 18 اور 19 اکتوبر کو پارٹی سربراہ مولانا فضل الرحمان کی صدارت میں سب آفس اسلام آباد میں منعقد ہوگا، جس میں ملک بھر سے مجلسِ شوریٰ کے ارکان شرکت کریں گے۔ اجلاس کے ایجنڈے میں کے پی میں گورنر راج کا نفاذ سرِ فہرست ہے، جبکہ مشرقِ وسطیٰ میں کشیدگی بالخصوص حرمین شریفین کی سیکیورٹی کی صورتحال، مہنگائی و بے روزگاری کے خلاف جاری پارٹی تحریک کا جائزہ اور وفاقی و صوبائی حکومتوں کی کارکردگی کا تفصیلی احاطہ کیا جائے گا۔ ترجمان کا کہنا تھا کہ شوریٰ کے اجلاس میں موجودہ ملکی حالات کے تناظر میں آئندہ کے اہم سیاسی فیصلے اور آئندہ کا لائحہ عمل طے کیا جائے گا۔