وزیراعظم کی ایئرپورٹس پر سمارٹ سکینرز نصب کرنے کی منظوری

وزیراعظم محمد شہباز شریف نے ایئرپورٹس پر مسافروں کو درپیش مشکلات کے خاتمے اور سامان کی جانچ کے لیے فرسودہ طریقہ کار ترک کرتے ہوئے تمام بین الاقوامی ہوائی اڈوں پر فوری طور پر ’اسمارٹ اسکینرز‘ فضائی راستے سے منگوا کر نصب کرنے کی ہدایت کر دی ہے۔ اسلام آباد میں کسٹمز کے نظام کے جائزہ اجلاس کی صدارت کرتے ہوئے وزیراعظم نے واضح کیا کہ کسٹمز حکام کی جانب سے مسافروں کو بلاضرورت پوچھ گچھ اور ہراساں کرنے کی اجازت کسی صورت نہیں دی جائے گی۔ اجلاس میں ایف بی آر اور کسٹمز انفورسمنٹ فورس کی کارکردگی اور سمگلنگ کی روک تھام کا بھی جائزہ لیا گیا، جہاں وزیراعظم نے بتایا کہ ٹیکس چوری اور سمگلنگ کے خلاف زیرو ٹالرنس پالیسی برقرار رہے گی جبکہ جدید اصلاحات کے تحت نئے بھرتی شدہ 280 گڈز ایویلیوٹرز کی تربیت اکتوبر اور نومبر 2026 میں مکمل کی جائے گی۔