ایکنک کا ملک بھر میں 11 ترقیاتی منصوبوں کی منظوری دینے کا فیصلہ

نائب وزیراعظم و وزیر خارجہ سینیٹر اسحاق ڈار کی زیرِ صدارت قومی اقتصادی کونسل کی ایگزیکٹو کمیٹی (ایکنک) کے اعلیٰ سطحی اجلاس میں ملک بھر کے لیے توانائی، سڑکوں، پانی، صحت اور فرانزک سائنس کے شعبوں میں 11 اہم ترقیاتی منصوبوں کی منظوری دے دی گئی ہے۔ منظور شدہ منصوبوں میں خیبر پختونخوا کے علاقے لوئر دیر میں 40.8 میگاواٹ کا کوٹو ہائیڈرو پاور پراجیکٹ، گلگت بلتستان میں 100 میگاواٹ کے سولر پراجیکٹس اور بلوچستان میں لسبیلہ کینال کی بحالی سمیت میرانی ڈیم سے گوادر کو پانی کی فراہمی کے منصوبے شامل ہیں۔ علاوہ ازیں، پنجاب اربن لینڈ سسٹمز، اسلام آباد میں ‘کنگ سلمان ہسپتال’ اور نیشنل فرانزک ایجنسی کی جدید لیبارٹری کی منظوری بھی دی گئی۔ اسحاق ڈار نے تمام منصوبوں کو وقتِ مقررہ پر بغیر کسی اضافت کے مکمل کرنے کی سخت ہدایت کی۔