خیبرپختونخوا میں گورنر راج یا ایمرجنسی کے نفاذ پر اتفاق، وفاقی کابینہ کا اجلاس کل طلب

صدر مملکت آصف علی زرداری اور وزیراعظم محمد شہباز شریف کے درمیان ایوانِ صدر میں اہم ترین ملاقات ہوئی، جس میں خیبر پختونخوا کی ابتر امن و امان کی صورتحال کے پیشِ نظر صوبے میں گورنر راج یا ایمرجنسی کے نفاذ پر اصولی اتفاق کر لیا گیا ہے۔ ایوانِ صدر کے اعلامیے کے مطابق ملاقات میں ملک کی مجموعی سیاسی و سیکیورٹی صورتحال پر تفصیلی تبادلہ خیال کیا گیا اور 13 اکتوبر کو قومی اسمبلی و سینیٹ کے الگ الگ اجلاس بلانے کی منظوری دی گئی۔ ذرائع کے مطابق وفاقی حکومت نے خیبر پختونخوا کے 12 حساس و ضم شدہ اضلاع میں ایمرجنسی کے نفاذ اور انتظامی اختیارات وفاق کے سپرد کرنے کی تیاریاں مکمل کر لی ہیں، جبکہ آئینی و قانونی آپشنز اور گورنر راج کی سمری کی حتمی منظوری کے لیے وفاقی کابینہ کا ہنگامی اجلاس طلب کر لیا گیا ہے۔