فلسطین میں صدارتی اور پارلیمانی انتخابات ملتوی، نئی تاریخ کا اعلان

فلسطینی صدر محمود عباس نے نومبر 2026 میں ہونے والے قانون ساز اسمبلی کے انتخابات ملتوی کرتے ہوئے صدارتی اور پارلیمانی انتخابات کے لیے 11 ستمبر 2027 کی نئی تاریخ کا اعلان کر دیا ہے۔ فلسطینی سرکاری خبر رساں ایجنسی کے مطابق نئے صدارتی حکم نامے کے تحت اب دونوں انتخابات ایک ہی روز منعقد ہوں گے۔ یہ فیصلہ فلسطین لبریشن آرگنائزیشن (پی ایل او) کی ایگزیکٹو کمیٹی اور مختلف سیاسی دھڑوں کی باہمی مشاورت کے بعد کیا گیا، جس میں موقف اختیار کیا گیا کہ اسرائیلی اقدامات، رکاوٹوں اور موجودہ زمینی و سیکیورٹی صورتحال کے باعث شفاف اور تمام طبقات کی شمولیت سے انتخابات کا انعقاد ممکن نہیں تھا۔ نئی تاریخ کے مطابق اب ستمبر 2027 میں فلسطینی عوام اپنی نئی قیادت اور قانون ساز اسمبلی کا انتخاب کریں گے۔