ملتان کے گھر میں دھماکے سے ماں اور 13 سالہ بیٹا جاں بحق

پنجاب کے شہر ملتان میں تھانہ سیتل ماڑی کی حدود نیک ٹاؤن میں واقع ایک گھر میں پراسرار دھماکے کے نتیجے میں ماں اور اس کا 13 سالہ بیٹا موقع پر ہی جاں بحق ہو گئے۔ پولیس کے مطابق جاں بحق افراد کی شناخت نصرت بی بی اور اس کے بیٹے انس کے نام سے ہوئی ہے، جن کی لاشوں کو نشتر ہسپتال منتقل کر دیا گیا ہے۔ ابتدائی اطلاعات کے مطابق بچہ باہر سے گیند نما کوئی مشکوک چیز گھر لایا تھا جو اچانک دھماکے سے پھٹ گئی۔ پولیس حکام کا کہنا ہے کہ واقعے کی تحقیقات کا آغاز کر دیا گیا ہے اور بم ڈسپوزل اسکواڈ و شواہد کی مدد سے دھماکے کی اصل نوعیت کا تعین کیا جا رہا ہے۔