سہیل آفریدی کو لانگ مارچ کے بجائے امن پر توجہ دینی چاہیے تھی: امیر مقام

وفاقی وزیر امور کشمیر انجینئر امیر مقام نے خیبر پختونخوا کے وزیراعلیٰ سہیل آفریدی کو تنقید کا نشانہ بناتے ہوئے کہا ہے کہ انہیں لانگ یا شارٹ مارچ کی سیاست کرنے کے بجائے صوبے میں امن و امان کی خراب صورتحال کی بہتری پر توجہ دینی چاہیے تھی۔ پشاور میں ایک تقریب سے خطاب کرتے ہوئے امیر مقام نے الزام عائد کیا کہ پی ٹی آئی کی صوبائی حکومت نے گزشتہ ڈھائی ماہ سے صوبے کو مفلوج کر رکھا ہے اور 13 سال سے عوام کے لیے صرف مشکلات پیدا کی ہیں۔ انہوں نے کہا کہ پی ٹی آئی کا لانگ مارچ اسلام آباد کبھی نہیں پہنچ سکتا اور لانگ مارچ کے نام پر لوگوں کو لوٹا جا رہا ہے۔ وفاقی وزیر نے اس عزم کا اظہار بھی کیا کہ خیبر پختونخوا کے عوام صرف امن، استحکام اور ترقی چاہتے ہیں اور جلد صوبے سے دہشت گردی کا مکمل خاتمہ ہوگا۔