پاکستانی سفیر آمنہ بلوچ کی اسحاق ڈار سے ملاقات، پاک ترکیہ تعلقات مستحکم بنانے پر زور

ترکیہ کے لیے پاکستان کی نامزد سفیر آمنہ بلوچ نے نائب وزیراعظم اور وزیر خارجہ اسحاق ڈار سے ملاقات کی، جس میں پاکستان اور ترکیہ کے درمیان قریبی، دیرینہ اور برادرانہ تعلقات کے فروغ پر تفصیلی تبادلہ خیال کیا گیا۔ ترجمان دفتر خارجہ کے مطابق اسحاق ڈار نے دونوں ممالک کے تعلقات کو خصوصی اور سٹریٹجک اہمیت کا حامل قرار دیتے ہوئے دفاع، سکیورٹی، تجارت اور سرمایہ کاری کے شعبوں میں باہمی تعاون کو مزید تقویت دینے کی ضرورت پر زور دیا۔ نائب وزیراعظم نے بطور سیکرٹری خارجہ آمنہ بلوچ کی خدمات کا اعتراف کرتے ہوئے انہیں سراہا اور ترکیہ میں پاکستان کی سفیر کی حیثیت سے ان کی نئی ذمہ داریوں کے لیے نیک خواہشات کا اظہار کیا۔