شرجیل انعام میمن کا حافظ نعیم الرحمان کے بیان پر شدید ردعمل سامنے آگیا

سندھ کے سینئر وزیر شرجیل انعام میمن نے امیر جماعت اسلامی حافظ نعیم الرحمان کے حالیہ بیان پر شدید ردعمل کا اظہار کرتے ہوئے کہا ہے کہ غریبوں کی امداد کو ’بھیک‘ کہنا منافقانہ اور غریب دشمن سوچ کا عکاس ہے۔ انہوں نے کہا کہ ضرورت مند خاندانوں اور غریب خواتین کی تضحیک کرنا انتہائی شرمناک ہے اور دو وقت کی روٹی سے محروم طبقے کے سہارے پر سیاست کرنا بے حسی کی انتہا ہے۔ شرجیل میمن نے واضح کیا کہ بینظیر انکم سپورٹ پروگرام (BISP) دنیا کا ایک تسلیم شدہ شفاف فلاحی پروگرام ہے جس کا اعتراف عالمی ادارے بھی کر چکے ہیں۔ انہوں نے جماعت اسلامی کو تنقید کا نشانہ بناتے ہوئے کہا کہ پریس کانفرنسوں کی سیاست کرنے کے بجائے جماعت اسلامی عوام کی خدمت کا اپنا کوئی ایک کارنامہ بتائے، جبکہ پیپلز پارٹی بلا تفریق غریبوں کی امداد اور ریاست کی ذمہ داریاں پوری کرتی رہے گی۔