ایران کے سپریم لیڈر سید علی خامنہ ای کو قتل کرنا سنگین غلطی تھی: سابق ڈپٹی چیف آف اسٹاف اسرائیل

اسرائیلی فوج کے سابق ڈپٹی چیف آف اسٹاف اور ڈیموکریٹس پارٹی کے سربراہ یائر گولان (Yair Golan) نے وزیراعظم بنجمن نیتن یاہو کی جنگی پالیسیوں پر شدید تنقید کرتے ہوئے اعتراف کیا ہے کہ جنگ کے آغاز پر ایران کے سپریم لیڈر آیت اللہ سید علی خامنہ ای کا قتل اسرائیل کی ایک سنگین ترین اسٹریٹجک غلطی تھی۔ ایک دھماکے دار انٹرویو میں اسرائیلی اپوزیشن رہنما نے واضح کیا کہ ایران کے ساتھ جاری ہمہ گیر جنگ نے خطے میں اسرائیل کی پوزیشن کو بہتر کرنے کے بجائے مزید ابتر اور معاشی و عسکری لحاظ سے کمزور کر دیا ہے۔

یائر گولان نے انکشاف کیا کہ 86 سالہ عمر رسیدہ ایرانی سپریم لیڈر کا ہونا ایک طرح سے توازن قائم رکھتا تھا، لیکن ان کو قتل کرنے سے اسرائیل کو کوئی فائدہ حاصل نہیں ہوا۔ ان کا کہنا تھا کہ اس کارروائی کے بعد ایران میں اسلامی انقلابی حکومت کا تختہ الٹنے کا اسرائیلی خواب چکنا چور ہو گیا، جبکہ اس کے برعکس تہران میں قدامت پسند اور سخت گیر عناصر مزید مضبوط ہو کر ابھرے ہیں جس سے اسرائیل کے طویل المدتی سلامتی کے مفادات کو شدید سیٹ بیک پہنچا ہے۔ انہوں نے نیتن یاہو کو آڑے ہاتھوں لیتے ہوئے کہا کہ وزیراعظم نے غیر حقیقت پسندانہ جنگی اہداف طے کر کے تاریخی موقع ضائع کر دیا، جس کا نتیجہ اسرائیل کی ناکامی کی صورت میں نکلا ہے۔ انٹرویو کے دوران یائر گولان نے اسرائیل کی الٹرا آرتھوڈوکس (حریدی) آبادی کو بھی ملک کی معیشت پر بوجھ اور “طفیلیے” (Parasites) قرار دیا۔