حوثیوں کے تازہ حملوں کے بعد سعودی عرب کا فلائٹ آپریشن شدید متاثر

سعودی عرب کے دارالحکومت ریاض میں کنگ خالد انٹرنیشنل ایئرپورٹ پر ہونے والے تازہ حملوں اور سیکیورٹی خدشات کے بعد فضائی آپریشن شدید ترین تعطل کا شکار ہو گیا ہے، جس کے باعث ایئرپورٹ کی درجنوں پروازیں منسوخ اور دیگر شہروں کی طرف موڑ دی گئی ہیں۔ فلائٹ شیڈول کے اعدادوشمار کے مطابق آج اتوار کو ریاض ایئرپورٹ کی کل 750 شیڈول پروازوں میں سے 446 پروازیں منسوخ کر دی گئی ہیں، جبکہ ریاض آنے والی متعدد بین الاقوامی و ملحقاتی پروازوں کو متبادل کے طور پر دمام، جدہ اور مدینہ منورہ کے ہوائی اڈوں پر اتارا گیا ہے۔ اس کے علاوہ دمام جانے والی بعض پروازوں کو بھی فضا میں ہولڈ پر رکھا گیا اور لینڈنگ کے لیے طویل انتظار کرنا پڑا۔

ریاض ایئرپورٹ اس فضائی بحران کے باعث دنیا کا سب سے زیادہ متاثر ہونے والا ہوائی اڈا بن گیا ہے جہاں پروازوں میں اوسط تاخیر 170 منٹ ریکارڈ کی گئی ہے، اور پروازوں میں خلل کا انڈیکس اپنی آخری یعنی پانچویں سطح پر پہنچ چکا ہے۔ صورتحال کی سنگینی کا اندازہ اس بات سے لگایا جا سکتا ہے کہ جدہ ایئرپورٹ کی 830 میں سے 92، دمام ایئرپورٹ کی 240 میں سے 39 اور مدینہ ایئرپورٹ کی 230 میں سے 26 پروازیں بھی منسوخ کرنا پڑی ہیں۔ ریاض ایئرپورٹ کی بندش اور روٹس کی تبدیلی کے باعث مملکت کے دیگر بڑے ایئرپورٹس پر بھی مسافروں کا شدید رش اور فضائی نظام دباؤ کا شکار ہے۔