اسپیکر خیبرپختونخوا اسمبلی کا ارکان اسمبلی کی سکیورٹی واپس لینے پر اظہار تشویش، آئی جی کو مراسلہ ارسال کردیا

اسپیکر خیبرپختونخوا اسمبلی بابر سلیم سواتی نے صوبائی ارکانِ اسمبلی کی سرکاری سیکیورٹی واپس لیے جانے کے اقدام پر شدید تشویش کا اظہار کرتے ہوئے انسپکٹر جنرل (آئی جی) خیبرپختونخوا پولیس کو باضابطہ مراسلہ ارسال کر دیا ہے۔ اسپیکر نے اپنے مراسلے میں ہدایت کی ہے کہ قانونی جواز اور لازمی ضابطے کی تکمیل کے بغیر کسی بھی رکن اسمبلی کی سیکیورٹی واپس نہ لی جائے، جبکہ جن اراکینِ پارلیمنٹ کی سیکیورٹی واپس لی جا چکی ہے اسے فوری طور پر بحال کیا جائے۔

مراسلے میں واضح کیا گیا ہے کہ اراکینِ اسمبلی کی سیکیورٹی ‘اسمبلی مراعات ایکٹ 2026ء’ کے تحت قانونی تقاضوں سے مشروط ہے۔ اسپیکر بابر سلیم سواتی کا کہنا تھا کہ صوبے کی موجودہ سیکیورٹی صورتحال میں عوامی نمائندوں سے سیکیورٹی واپس لینے کے عمل سے ان کی زندگیوں کو سنگین خطرات لاحق ہو سکتے ہیں۔ انہوں نے تاکید کی کہ منتخب عوامی نمائندوں کے جان و مال کا تحفظ اور تمام قانونی تقاضوں کی پاسداری ہر صورت یقینی بنائی جائے، نیز خبردار کیا کہ کسی بھی ناخوشگوار واقعے کی صورت میں متعلقہ سیکیورٹی حکام کے خلاف قانون کے مطابق سخت کارروائی کی جائے گی۔