آبنائے ہرمز میں آئل ٹینکر بارودی سرنگ سے ٹکراگیا؛ خوفناک آگ بھڑک اُٹھی

ایران کے اسلامی انقلابی گارڈز کور (آئی آر جی سی) نے دعویٰ کیا ہے کہ اہم تجارتی گزرگاہ آبنائے ہرمز سے گزرنے والا ایک آئل ٹینکر سمندری بارودی سرنگ (Naval Mine) سے ٹکرا گیا ہے، جس کے نتیجے میں جہاز میں ایک زور دار دھماکا ہوا اور اس میں آگ بھڑک اٹھی۔ غیر ملکی خبر رساں ادارے رائٹرز کے مطابق ایرانی سرکاری میڈیا نے ہفتے کے روز انقلابی گارڈز کے بیانات کا حوالہ دیتے ہوئے تصدیق کی کہ یہ تخریبی واقعہ آبنائے ہرمز کے پانیوں میں پیش آیا ہے۔

تاہم ایرانی حکام نے تاحال حادثے کا شکار ہونے والے آئل ٹینکر کا نام، اس کے ملکی پرچم یا جہاز پر سوار عملے کی خیریت کے بارے میں کوئی بھی تفصیلی معلومات فراہم نہیں کی ہیں۔ اس لرزہ خیز واقعے کے نتیجے میں ہونے والے ممکنہ جانی نقصان اور سمندر میں تیل کے اخراج (Oil Spill) سے متعلق بھی تاحال کسی بھی آزادانہ ذرائع سے تصدیق سامنے نہیں آ سکی ہے۔ آئی آر جی سی کے جاری کردہ بیان میں سخت الفاظ میں کہا گیا ہے کہ غیر قانونی اور چور راستے استعمال کرنے والے جہازوں کو اپنے عمل کی سزا بھگتنا ہوگی اور ضرورت پڑنے پر یہ راستہ بھی بند کر دیا جائے گا۔ واضح رہے کہ بین الاقوامی بحری سلامتی کے اداروں نے خطے میں تجارتی جہاز رانی پر بڑھتے ہوئے خطرات اور مشتبہ سیکیورٹی واقعات پر شدید تشویش کا اظہار کیا ہے۔