مولانا فضل الرحمان کا وزیراعظم سے ملاقات کے بعد پی ٹی آئی سے رابطہ

جمعیت علمائے اسلام (ف) کے سربراہ مولانا فضل الرحمان نے خیبرپختونخوا کی ابتر سیاسی و آئینی صورتِ حال اور پیدا شدہ بحران کے حل کے لیے سیاسی رابطے تیز کر دیے ہیں۔ وزیراعظم شہباز شریف سے اہم ملاقات کے بعد مولانا فضل الرحمان نے پاکستان تحریک انصاف (پی ٹی آئی) کی مرکزی قیادت سے رابطہ کیا اور انہیں وفاقی حکومت کے موقف اور تحفظات سے تفصیلی طور پر آگاہ کیا۔ اس اہم پیش رفت کے بعد پی ٹی آئی کے چیئرمین بیرسٹر گوہر علی خان مولانا فضل الرحمان سے ملاقات کے لیے ان کی رہائش گاہ پہنچ گئے۔

ذرائع کے مطابق مولانا فضل الرحمان نے وزیراعظم شہباز شریف سے ملاقات میں حکومت اور پی ٹی آئی کے درمیان درپیش تنازعات اور بالخصوص خیبرپختونخوا کے معاملے پر فہم و فراست سے سیاسی تصفیہ نکالنے کے لیے مزید وقت مانگا تھا۔ وزیراعظم نے مولانا فضل الرحمان کی مفاہمتی اور مصالحتی کوششوں کا خیرمقدم کرتے ہوئے انہیں پی ٹی آئی قیادت کے ساتھ مشاورت کا دائرہ کار وسیع کرنے کے لیے مزید وقت دینے پر رضامندی ظاہر کی ہے۔ سیاسی تجزیہ کاروں کا کہنا ہے کہ مولانا فضل الرحمان کی درمیانی راہ نکالنے کی یہ کوشش وفاق اور خیبرپختونخوا حکومت کے درمیان جاری آئینی تعطل اور گورنر راج کے خطرات کو ٹالنے میں اہم ثابت ہو سکتی ہے