پولیس نے تمام اراکین پارلیمنٹ کی سیکیورٹی واپس لے لی ہے، شفیع جان

خیبرپختونخوا کے صوبائی وزیر اطلاعات شفیع جان نے دعویٰ کیا ہے کہ صوبائی پولیس کی جانب سے ان کی اور دیگر تمام اراکینِ پارلیمنٹ کی سرکاری سیکیورٹی واپس لے لی گئی ہے۔ پیر کو سماجی رابطے کی ویب سائٹ ایکس (سابقہ ٹوئٹر) پر اپنے ایک بیان میں صوبائی وزیر نے اس سیکیورٹی واپسی کی تصدیق کرتے ہوئے پولیس انتظامیہ پر شدید تحفظات کا اظہار کیا۔

شفیع جان کا کہنا تھا کہ خیبرپختونخوا پولیس کی جانب سے اراکینِ پارلیمنٹ سے سیکیورٹی واپس لینا ایک انتہائی تشویشناک قدم ہے۔ انہوں نے خبردار کرتے ہوئے واضح کیا کہ اگر اس دوران انہیں یا کسی بھی پارلیمنٹیرین کو کوئی نقصان پہنچتا ہے تو اس کی تمام تر ذمہ داری انسپکٹر جنرل (آئی جی) خیبرپختونخوا پولیس پر عائد ہوگی۔