کراچی، عمرہ زائرین اور بین الاقوامی مسافروں کی ویکسی نیشن شروع

کراچی ایئرپورٹ پر عمرہ زائرین اور دیگر بین الاقوامی مسافروں کے لیے ویکسی نیشن کے بغیر سفر کرنے کی عارضی رعایت کی مدت ہفتے کے روز ختم ہو گئی، جس کے بعد ایئرپورٹ پر مسافروں کو پولیو، میننجائٹس (گردن توڑ بخار) اور دیگر لازمی ویکسین لگانے کا عمل دوبارہ باقاعدہ طور پر شروع کر دیا گیا ہے۔ بارڈر ہیلتھ سروسز کے زیرِ انتظام جناح ٹرمینل (اسٹار گیٹ) کے قریب سول ڈسپنسری میں انٹرنیشنل ٹریولر ویکسی نیشن سینٹر کو مکمل طور پر فعال کر دیا گیا ہے، جہاں مسافروں کو چوبیس گھنٹے ویکسی نیشن کی سہولت فراہم کی جا رہی ہے۔

بارڈر ہیلتھ کے حکام کے مطابق عمرہ زائرین کے لیے میننجائٹس اور پولیو جبکہ افریقہ اور جنوبی امریکہ جانے والے مسافروں کے لیے یلو فیور (پیلا بخار) کی ویکسین لگوانے کی لازمی شرط پر عملدرآمد کی مدت میں اس سے قبل دو مرتبہ توسیع کی جا چکی تھی جو اب ختم ہو چکی ہے۔ فوکل پرسن بارڈر ہیلتھ ڈاکٹر غلام مرتضیٰ شاہ نے بتایا کہ مسافروں کی سہولت کے لیے ایئرپورٹ پر ہی ویکسی نیشن اور سرٹیفکیٹس کے اجرا کے تمام انتظامات مکمل کر لیے گئے ہیں۔ مقررہ فیسوں کے تحت میننجائٹس کی ویکسین کی قیمت 2 ہزار 785 روپے جبکہ انفلوئنزا ویکسین کی فیس ایک ہزار 720 روپے مقرر کی گئی ہے، جبکہ پولیو کی قطرے مسافروں کو بالکل مفت فراہم کیے جائیں گے۔ حکام نے مسافروں کو ہدایت کی ہے کہ وہ سفر سے قبل اپنی منزل کے طبی تقاضے پورے کریں اور سرٹیفکیٹس لازمی حاصل کریں۔