حکومت بزرگ شہریوں کی فلاح وبہبود کیلئے اقدامات کر رہی ہے: مریم نواز

وزیراعلیٰ پنجاب مریم نواز شریف نے کہا ہے کہ پنجاب حکومت بزرگ شہریوں کی عزت، وقار اور فلاح و بہبود کے لیے ترجیحی بنیادوں پر عملی اقدامات کر رہی ہے۔ بزرگ افراد کے عالمی دن کے موقع پر اپنے خصوصی پیغام میں وزیراعلیٰ نے ملک بھر کے بزرگوں کو زبردست خراجِ تحسین پیش کیا اور ان کی صحت، سلامتی اور درازیٔ عمر کے لیے دعا کی۔

مریم نواز شریف نے اپنے پیغام میں کہا کہ بزرگ ہمارے ماضی کا عکس، حال کی روشنی اور مستقبل کے لیے ہدایت کا سرچشمہ ہیں، جبکہ ان کا احترام ہماری اسلامی روایات اور تہذیب کا بنیادی حصہ ہے۔ انہوں نے بتایا کہ حکومت پنجاب بزرگ شہریوں کے لیے قائم اولڈ ہومز کے معیار کو مزید بہتر بنا رہی ہے جبکہ وہاں مقیم بزرگوں کو سرکاری سطح پر حج کی سعادت بھی فراہم کی گئی ہے۔ اس کے علاوہ پنجاب حکومت الیکٹرک بسوں میں بزرگ افراد کو مفت سفر کی سہولت فراہم کر رہی ہے۔ وزیراعلیٰ نے بالخصوص نوجوان نسل سے اپیل کی کہ وہ اپنے بزرگوں کے تجربات سے فائد اٹھائیں اور ان کا احترام و خدمت اپنا شعار بنائیں۔