برطانیہ میں ڈیزل کی قیمت میں ریکارڈ اضافہ، 2 پاؤنڈ فی لٹر تک پہنچ گئی

برطانیہ میں جاری عالمی توانائی کے بحران کے باعث ڈیزل کی قیمت تاریخ میں پہلی بار 2 پاؤنڈ فی لٹر کی ریکارڈ سطح پر پہنچ گئی ہے۔ دوسری جانب پٹرول کی اوسط قیمت 174.71 پنس فی لٹر ریکارڈ کی گئی ہے، جو ایران کے تنازع اور مشرقِ وسطیٰ میں بڑھتی ہوئی کشیدگی کے آغاز سے اب تک تقریباً 41.9 پنس فی لٹر زیادہ ہے۔ برطانوی اداروں کے مطابق ایندھن کے نرخوں میں اس بے تحاشا اضافے کے بعد ایک عام فیملی کار کی ٹینکی فل کروانے کا خرچہ اب تقریباً 110 پاؤنڈز تک پہنچ چکا ہے۔

ماہرین کا کہنا ہے کہ ڈیزل کی قیمتوں میں غیر معمولی اضافے سے گھریلو صارفین کے ساتھ ساتھ ٹرانسپورٹ، ہول سیل ڈلیوری اور دیگر صنعتی کاروبار شدید مالی دباؤ کا شکار ہو گئے ہیں، جس سے برطانیہ میں افراطِ زر (مہنگائی) مزید بڑھنے کا خدشہ ظاہر کیا جا رہا ہے۔ برطانوی حکومت نے ایندھن کی دستیابی اور ذخائر کے حوالے سے اطمینان کا اظہار کیا ہے، تاہم عالمی منڈی میں خام تیل کی فراہمی میں رکاوٹوں اور جیو پولیٹیکل کشیدگی کو اس تاریخی اضافے کی بنیادی وجہ قرار دیا جا رہا ہے