حج 2027 کیلئے واجبات کی دوسری قسط جمع کروانے کی تاریخ کا اعلان

وفاقی وزارتِ مذہبی امور نے سرکاری سکیم کے تحت حج 2027 کے عازمین کے لیے اہم ہدایات جاری کرتے ہوئے حج واجبات کی دوسری قسط جمع کروانے کی تاریخ کا اعلان کر دیا ہے۔ ترجمان مذہبی امور کے مطابق عازمینِ حج 5 اکتوبر بروز پیر سے 20 اکتوبر تک اپنے واجبات کی دوسری قسط جمع کروا سکیں گے۔ تمام عازمین کو ہدایت کی گئی ہے کہ وہ پاک حج ایپ (Pak Hajj App) یا آن لائن ڈیجیٹل پورٹل کے ذریعے مقررہ وقت کے اندر ادائیگی یقینی بنائیں۔

وزارتِ مذہبی امور نے واضح کیا ہے کہ 20 اکتوبر کی مقررہ تاریخ تک دوسری قسط جمع نہ کروانے کی صورت میں عازمِ حج کی درخواست منسوخ تصور کی جائے گی اور اب تک جمع شدہ رقم ان کے بینک اکاؤنٹ میں واپس منتقل کر دی جائے گی۔ اس کے علاوہ حکام نے واجبات کی دوسری قسط جمع کروانے سے پہلے میڈیکل فٹنس سرٹیفکیٹ کو پاک حج ایپ یا پورٹل پر اپ لوڈ کرنا لازمی قرار دیا ہے۔